مصارحة ما بين يزبك وابو انطون!

في خطوة مفاجئة، قرر الفنان اللبناني أمير يزبك يطوي صفحة الخلاف مع الشاعر حبيب بو أنطون، بعد أسابيع من السجالات والاتهامات اللي تصدّرت السوشيال ميديا..

واللي كان واضح إن الأزمة وصلت لطريق مسدود، انتهى بجلسة مصارحة ومصالحة رجّعت العلاقة بين الطرفين متل ما كانت..

اللقاء صار بدعوة من الشيخ سالم عكاري، وبحضور رجل الأعمال روبير مخلوف وعدد من وجهاء المنطقة..

وبعد الجلسة، نشر أمير يزبك صورتين جمعوه بحبيب بو أنطون، وأكد إن سوء التفاهم صار من الماضي، وإن الصفحة انطوت بشكل نهائي.

يمكن أكتر شي لفت الناس بهالقصة هو سرعة التحوّل. من تبادل اتهامات علنية وحديث عن خيانة ولجوء للقضاء، إلى مصافحة وصور مشتركة خلال أيام..

وهيدا الشي خلّى كتار يعتبروا إن بعض الخلافات، مهما كبرت على السوشيال ميديا، ممكن تنتهي بالحوار.

بداية الأزمة كانت بعد انتشار أخبار عن ارتباط رنيم إسحق، ملكة جمال سوريا السابقة وطليقة أمير يزبك، بالشاعر حبيب بو أنطون..

وقتها، خرج أمير باتهامات مباشرة، وقال إن العلاقة بدأت قبل انتهاء زواجه، واعتبر إن اللي صار كان خيانة، مؤكداً إن عنده مستندات وتسجيلات تثبت كلامه.

وبعدها انتشرت معلومات بتقول إن رنيم دفعت خمسة آلاف دولار وقدمت هدايا لحبيب بو أنطون وشقيقه إيلي بهدف استفزاز طليقها، لكن رنيم نفت هالادعاءات بشكل قاطع..

وأكدت إن كل هالأخبار ما إلها أي أساس من الصحة، وإن حبيب وإيلي ما إلهم أي علاقة بأسباب انفصالها عن أمير..

وقبل المصالحة بأيام، كان أمير يزبك خفّف من حدّة موقفه، ووصف اللي صار بسوء تفاهم، وأبدى استعداده لإنهاء الخلاف إذا توضحت الأمور..

وهيدا اللي حصل فعلاً، مع لقاء أنهى الأزمة بينه وبين حبيب بو أنطون، بينما فضّلت رنيم إسحق تضل بعيدة عن أي سجال جديد، مكتفية بنفي الاتهامات والدعوة لعدم التدخل بحياتها الخاصة.